கவிதை அன்றும் இன்றும்

அன்று
 ஆரோக்கியம் கொடுத்த
சோளச் சோறும்
அகத்திக்கீரையும்...
 இன்று அந்நியமானது .

கேழ்வரகும்
கம்பங்கூழும் ....
கேட்பாரற்று போனது ...

கும்பாக்களில் குடித்த
கிராமத்து கஞ்சிகள்
 இன்று குடுவையில் ...
விற்பனையாகிறது ....

சோளப் பொரி
பொரிகடலை ...
வறுத்த ஈசல் ..
சேர்த்துக் தின்ற
 நொறுக்குத் தீனி
 இன்று அப்பளமாய்
சுருங்கிப்போனது ...

அதனால்
சர்க்கரையும்
ரத்த அழுத்தமும்
 ஏழையின் வீட்டுக்கும்
விருந்தாளியானது.

வயது 70 ஆன பின்பும்
 வான் தொடும் பனையேறி
பதநீரும் நுங்கும்
 பக்குவமாய். ..
 இறக்கி தந்த -
தாத்தாக்களை
புதைத்த இடத்தில்
புல் முளைத்து விட்டது .

பதநீர் குடிக்கவே
பலமில்லாத
பதினாறுகள்
படையெடுக்கிறது
டாஸ்மாக் கடைக்கு...

 வாய்க்கால் தண்ணீரையும்
 வயல் தண்ணீரையும் . .
தாகம் எடுக்கும் போது
வயிறு முட்ட குடித்தோம்
வாந்திபேதி வந்ததில்லை..
 வைத்தியர் பக்கம் சென்றதில்லை

ஏர் உழும் கலப்பை
தண்ணீர் இரைக்கும்
கூனை ...
மாடு பிடிக்கும் வடம்
மரக்கட்டை சக்கரம் கொண்ட
 மாட்டு வண்டி ...
கிணறுகள் தோறும்
 இருக்கும் கமலக்கிடங்கு
அறிவியல் வளர்ச்சியால்
 அனைத்தையும் தொலைத்தோம்... தொலைத்தது சரிதான் .

ஆரோக்கியத்தையும்
ஆனந்தத்தையும்
 எதனால் இழந்தோம்
என்றாவது
 சிந்தித்தோமா '.....?